Meta bir vaqtning o‘zida bir nechta sun’iy intellekt agentlarini ishga tushirib, kod yozish va sinash imkonini beradigan ilovaga ega Conductor startapini sotib olib, dasturchilar uchun mo‘ljallangan vositalar bo‘yicha poygada o‘z pozitsiyasini mustahkamladi.

Axios 4-noyabr kuni bitim haqida birinchi bo‘lib xabar berdi va Meta ushbu xaridni tasdiqladi, biroq moliyaviy tafsilotlar oshkor etilmagan. Tahlilchilarning ta’kidlashicha, kodlash vositalarini nazorat qilish yirik AI kompaniyalari uchun strategik ustuvor yo‘nalishga aylanib bormoqda va Meta aniqki, bu borada ortda qolishni istamaydi.

Conductor bosh direktori Charlіe Holtz bu yangilikni katta xursandchilik bilan qabul qildi: u X ijtimoiy tarmog‘idagi postida jamoa Meta tarkibiga qo‘shilayotganini va "keyingi interfeys uchun juda katta, g‘ayrioddiy rejalar" borligini yozdi. Holtzning qo‘shimcha qilishicha, guruh Meta Superintelligence Labs tarkibida Nat Friedman va Alexander Wang bilan birga ishlaydi va laboratoriyani eng iqtidorli jamoalardan biri deb atadi.

TechCrunch ma’lumotiga ko‘ra, Conductor foydalanuvchilari kelasi yil boshidayoq “yangi narsalar”ni ko‘rishadi. Axios manbalari Meta ushbu jamoaning mahsulotni tez ishlab chiqish tajribasidan foydalanib, AI asosidagi dasturlash vositalarining keyingi avlodini yaratishni rejalashtirayotganini bildiradi.

• Yangi foydalanuvchilar ro‘yxatdan o‘tishi va ilovani yuklab olish 4-noyabrdan to‘xtatilgan.
• Pro obunachilar uchun pullik funksiyalar vaqtincha bepul tarzda ochib berilgan.

The Verge xabariga ko‘ra, Conductor Cloud 13-noyabr kuni faqat o‘qish rejimiga (read-only) o‘tkaziladi, 20-noyabr kuni esa bulut xizmati butunlay o‘chiriladi. Shundan so‘ng foydalanuvchi ma’lumotlarini o‘chirish jarayoni boshlanadi va faol obunachilarga qaytarimlar amalga oshiriladi.

Conductor’ning lokal macOS ilovasi esa 2027-yil boshlariga qadar model yangilanishlari va muhim xatolarni tuzatishga oid yangilanishlarni olishni davom ettiradi. Kompaniya foydalanuvchi ma’lumotlari hech qachon sotilmaganini va modellarga o‘qitish uchun ishlatilmaganini alohida ta’kidlaydi.

Holtz va CTO Jackson de Campos tomonidan 2024-yilda tashkil etilgan Conductor har bir AI agentga kod bazasining alohida nusxasini taqdim etadi, dasturchilarga agentlar chiqishini tekshirishda yordam beradi va tasdiqlangan o‘zgarishlarni asosiy kodga xavfsiz tarzda birlashtiradi. Platforma Anthropic’ning Claude Code’i va OpenAI’ning Codex’i kabi uchinchi tomon agentlarini qo‘llab-quvvatlaydi. Mart oyida startup Spark Capital va Matrix boshchiligidagi A seriya investitsiya raundida 22 million dollar jalb qildi va xizmatdan 100 mingdan ortiq foydalanuvchi, jumladan Meta, Google va Spotify muhandislari foydalanayotgani aytilgan.

Bu sotib olish Meta’ning kengroq strategik yo‘nalishiga mos keladi. Avgust oyida kompaniya Muse Code nomli dasturchi agentini ishga tushirdi va bir necha oydan beri dasturchilar unumdorligini oshirishga qaratilgan vositalar yaratib kelmoqda. Boshqa o‘yinchilar ham faol: Meta Conductor bitimini e’lon qilgan kuni OpenAI ham dasturchilar uchun mo‘ljallangan Pierre Computer nomli yana bir startup’ni sotib olish rejalari haqida ma’lum qildi.

Meta AI dasturlash kelajagini “dasturchilar uchun agentlar ‘armiyasini’ boshqarishni osonlashtirish” g‘oyasi atrofida shakllantirmoqda, boshqacha aytganda, ko‘plab avtonom yordamchilarni keng ko‘lamda muvofiqlashtirish orqali dasturiy ta’minot ishlab chiqish jarayonini tezlashtirishni maqsad qilgan.